Америка Құрама Штаттары Дүниежүзілік денсаулық сақтау ұйымының (ДДҰ) құрамынан ресми түрде шықты, бұл шешім ұйымды күрделі қаржылық дағдарысқа ұшыратуы мүмкін, деп хабарлайды Zhaiyqmedia ақпарат агенттігі.
Бұл қадам АҚШ президенті Дональд Трамптың әкімшілігі бір жыл бұрын бастаған процедураны толық аяқтады. 22 қаңтардан бастап Құрама Штаттар ұйымға мүше болып саналмайды.
ДДҰ мәліметінше, АҚШ 2024-2025 жылдарға арналған 260 миллион доллар көлеміндегі жарнасын төлемей кеткен. Бұл ұйымның жалпы бюджетінің шамамен 18 пайызын құрайды. Осылайша, ең ірі донордан айырылу ұйым қызметіне айтарлықтай әсер етуі ықтимал.
Ресми Вашингтон өз шешімін ДДҰ қызметінің АҚШ-қа «елеулі экономикалық зиян келтіргенімен» түсіндірді.
«Америка Құрама Штаттарының шығуы – бүкіл әлем үшін үлкен жоғалту», – деді ДДҰ басшысы Тедрос Адханом Гебрейесус. Ол АҚШ үкіметі бұл шешімді қайта қарастырады деп үміттенетінін білдірді.
Фото: Әлеуметтік желіден
