Иранның рухани көсемі Әли Хаменеи елдегі наразылықтар кезінде мыңдаған адамның қаза тапқанын алғаш рет көпшілік алдында мойындады, деп хабарлайды Zhaiyqmedia ақпарат агенттігі.
Алайда, аятолла Әли Хаменеи бұл адамдардың өліміне АҚШ-ты кінәлады. Иранның мемлекеттік ақпарат құралдары оның сөзін былай келтірді:
«Біз АҚШ президентін иран халқына қарсы жасалған жала, келтірілген шығын мен құрбандар үшін қылмыскер санаймыз».
Бұған дейін АҚШ президенті Дональд Трамп ирандық шерушілерді «наразылықты жалғастыруға» шақырып, егер Тегеран күштік құрылымдар арқылы халықты жазалайтын болса, Вашингтонның әскери шара қолдануы мүмкін екенін ескерткен.
АҚШ-та орналасқан HRANA атты ирандық құқық қорғаушылар ақпарат агенттігінің мәліметінше, қақтығыстарды аяусыз басып-жаншу салдарынан 3090 адам мерт болған.
