Мәжіліс депутаты Үнзила Шапақ Қазақстандағы балалар үшін танымал Roblox ойын платформасының ықтимал қауіптерін бағалауға шақырды. Оның айтуынша, сервис аудиториясының басым бөлігі – кәмелетке толмағандар, ал олардың психикалық және физикалық денсаулығына төнетін қатерлер ата-аналар мен сарапшыларды алаңдатып отыр, деп хабарлайды Zhaiyqmedia ақпарат агенттігі.
Amanat фракциясының мүшесі Үкімет басшысының орынбасары Тамара Дүйсеноваға жолдаған депутаттық сауалында Roblox платформасында балалар тап болуы мүмкін бірнеше қауіпті атап өтті. Депутат бұл ойынның виртуалды тәуелділікке әкеліп, балалардың бойында агрессивті мінез-құлық қалыптастыратынын жеткізді.
«Платформадағы ойын чаттарын алаяқтар мен педофилдер балалармен байланыс орнату үшін пайдаланады. Олар жағымсыз контент таратып, балалардың психологиясына кері әсер етеді. Компания қауіпсіз ортаны қамтамасыз етеміз десе де, күн сайын жазылатын миллиондаған хабарламаны толық бақылау іс жүзінде мүмкін емес», – делінген депутат сауалында.
Осыған байланысты Үнзила Шапақ Үкіметтен Roblox ойынының балаларға әсерін жан-жақты бағалауды, қажет болса, бақылаудың қосымша шараларын қарастыруды сұрады. Сонымен қатар ол онлайн-ойын платформаларына қатысты тіркелген құқық бұзушылықтар туралы нақты деректерді ұсынуды талап етті.
Фото: Әлеуметтік желіден
