Батыс Қазақстан облысы өнеркәсіп, қайта өңдеу, ауыл шаруашылығы, денсаулық сақтау және экология салаларында Оңтүстік Кореямен ынтымақтастықты кеңейтпек. Бұл туралы облыс әкімі Нариман Төреғалиевтің Корея Республикасына жұмыс сапары барысында белгілі болды. Делегация құрамында аймақтың медициналық ұйымдары мен кәсіпкерлері болды.

Сапар аясында Батыс Қазақстан облысы мен Кореяның Халықаралық Әулие Мария клиникасы арасында меморандумға қол қойылып, екі өңір медицинасын жақсартуға бағытталған нақты келісімдер жасалды. Құжатқа сәйкес Орал қаласының ауруханаларынан барған 10 дәрігер аталмыш клиникада тағылымдамадан өтеді. Бұл — аймақ медицинасын халықаралық стандарттарға жақындатуға мүмкіндік беретін маңызды қадам.

Сонымен қатар енді Орал мен Инчхон қалаларының дәрігерлері ай сайын онлайн форматта бірлескен кеңес өткізіп, тәжірибе алмасып отырады. Бұл медициалық көмектің сапасын арттыруға, мамандардың кәсіби деңгейін көтеруге ықпал етеді.

Сурет: БҚО әкімдігі