Алматыда өткен «Қайрат» пен «Реал Мадрид» арасындағы тарихи ойынды онлайн тамашалағысы келген мыңдаған қазақстандық интернет пен тікелей эфир сапасының төмендігінен көре алмай қалды.
Мәжіліс депутаты Нартай Аралбайұлы бұл жағдайды сынға алып, «Қазақтелекомның» жұмысына наразылық білдірді.
> «Мұндай жүктеменің көп болатынын бәріміз білдік. Соған лайықтап дайындалу керек еді. Тарифті көтергенде алдына жан салмайтын «Қазақтелеком» осындай жағдай болатынын білді. Жанын салып жанкүйер болам деген азаматтардың жолын кескені – менің қатты жаныма батты. Кеше мыңдаған азаматтар испаниялық сайттардан көрді. Өз телеарнамыздан көре алмау – бұдан асқан қорлық жоқ», – деді депутат.
Жанкүйерлер әлеуметтік желілерде де байланыс сапасының төмендігін сынап, матчты шетелдік платформалардан көруге мәжбүр болғанын жазуда.
