Батыс Қазақстан облысында 2022 жылдан бері пайдаланылмаған немесе заңсыз иеленген 720 мың гектар ауыл шаруашылығы жері мемлекет меншігіне қайтарылды.
Облыстық әкімдіктің мәліметінше, соның ішінде 462 мың гектар қайта айналымға енгізіліп, ауыл шаруашылығымен айналысамын деген азаматтарға бөлініп берілген. Ал 258 мың гектар әзірге босалқы қорда қалып отыр. Жақын уақытта бұл жерлер де мақсатты айналымға шығарылмақ.
Президент Қасым-Жомарт Тоқаев биылғы Жолдауында: «Жер – стратегиялық ресурс. Оның игілігі халықтың тұрмысын жақсартуға қызмет етуі тиіс. Әкімдер қайтарылған жердің бәрін келесі жылдың ортасына дейін айналымға енгізуі керек», – деп атап өткен еді.
Мамандардың айтуынша, ауыл шаруашылығын дамыту үшін жерді тиімді пайдалану басты шарт. Алайда тәжірибе көрсеткендей, кейбір азаматтар бірнеше учаскеге ие бола тұра, оларды мақсатсыз пайдаланып, ауыл шаруашылығы саласының дамуына кедергі келтіруде.
