Орал қаласында «Азаматтық жауапкершілік және волонтерлік: адалдық құндылықтары негізінде» тақырыбында волонтерлер форумының панельдік отырысы ұйымдастырылды.
Форумның басты мақсаты – Батыс Қазақстан облысының волонтерлік корпусын дамыту, еріктілердің өзара тәжірибе алмасуына жағдай жасау және үздік волонтерлерді марапаттау.
Шараға азаматтық қоғам өкілдері, волонтерлік ұйымдар, белсенді жастар мен еріктілер қатысты. Форум барысында волонтерліктің әлеуметтік маңызы, құндылықтық негіздері және оны дамытудағы заңнамалық тетіктер жайы сөз болды.
Қатысушылар пікір алмасып, алдағы Халықаралық волонтерлер жылына дайындықтарын таныстырды.
Шара соңында өңірдің үздік белсенділері облыс әкімі Н.Төреғалиевтің Алғыс хатымен марапатталды. Марапаттарды облыс әкімінің орынбасары Қ.Меңдіғалиев табыстады.
Өңірлік коммуникациялар қызметі
