Сурет: Egemen Qazaqstan
Қырғызстанның Бішкек қаласындағы «Манас» халықаралық әуежайында Tez Jet әуе компаниясының ұшағы қону кезінде артқы шассилерінің бірі сынып, әуе кемесі сол жақ қанатына қисайып қалды, деп хабарлайды Zhaiyqmedia.kz ақпарат агенттігі.
Салдарынан жолаушылар шұғыл түрде эвакуацияланды. Кейбірі жеңіл жарақат алып, денелері сырылып, соғылған. Зардап шеккендерге медициналық көмек көрсетіліп жатыр.
«Қырғызстан әуежайлары» АҚ мәліметінше, оқиғаға байланысты «Манас» әуежайындағы барлық рейс уақытша тоқтатылды. Оқиға орнында өрт сөндіру қызметтері жұмыс істеуде.
Әуежай жергілікті уақыт бойынша сағат 22:00-ге дейін жабылды. Соның салдарынан 14 рейс кейінге шегерілді.
Алдын ала мәлімет бойынша, апат кезінде авиациялық керосин төгілген. Мамандар төгілген отынды тазалап, ұшақты ұшу-қону жолағынан эвакуациялағанға дейін әуежай ұшақтарды қабылдап, жөнелте алмайды.
«Қырғызстан әуежайлары» АҚ-ның хабарлауынша, ұшақ бортында 181 жолаушы болған. Оқиғаның себептері анықталып жатыр.
