Сурет: gazeta.ru
Ресей президенті Владимир Путин мен АҚШ президенті Дональд Трамп телефон арқылы сөйлесіп, Украинадағы қақтығыс, Иран төңірегіндегі жағдай, Ресей-АҚШ қатынастары және алдағы байланыстар мәселелерін талқылады. Әңгіме 1 сағат 25 минутқа созылды, деп хабарлайды Zhaiyqmedia.kz ақпарат агенттігі.
Кремльдің мәліметінше, телефон әңгімесі АҚШ тәуелсіздігінің 250 жылдығы күні өтті. Ресей президентінің көмекшісі Юрий Ушаковтың айтуынша, Владимир Путин Дональд Трамп пен АҚШ халқын мерейтоймен құттықтап, екі елдің тарихи байланыстарының маңызын атап өткен.
Ушаков сондай-ақ Дональд Трамптың маусым айында Ресей күніне орай Владимир Путинге құттықтау жолдағанын еске салды. Кремль өкілі президенттердің әңгімесін «іскерлік әрі сындарлы» деп бағалады.
Құттықтаудан кейін тараптар Украинадағы жағдайды талқылады. Әңгіме 7-8 шілде күндері Анкарада болатын НАТО саммиті қарсаңында өтті. Саммиттің күн тәртібінде Украинаға қолдау көрсету, альянсқа мүше елдердің қорғаныс шығындарын ұлғайту, әскери өндірісті кеңейту және қорғаныс саласында бірлескен сатып алулар мәселелері қарастырылмақ.
Путинмен сөйлеспес бұрын Дональд Трамп Украина президенті Владимир Зеленскиймен де телефон арқылы сөйлескен. Украина президенті кеңсесінің хабарлауынша, тараптар майдандағы ахуал мен қақтығысты дипломатиялық жолмен реттеу мүмкіндіктерін талқылаған. Владимир Зеленский кейінірек АҚШ-тың ұстанымы қақтығысты тоқтатуға ықпал етуі мүмкін екенін айтып, бұл мәселені НАТО саммиті барысында жалғастырып талқылауға келіскендерін мәлімдеді.
Кремльдің хабарлауынша, Дональд Трамп Украинадағы әскери іс-қимылдарды тоқтатуға жәрдемдесуге дайын екенін білдірген. Өз кезегінде Владимир Путин АҚШ президентін Ресейге сапармен келуге шақырған.
Телефон әңгімесінің қорытындысы бойынша Украина мәселесіне қатысты жаңа келісімдер жарияланған жоқ. Алайда екі мемлекет басшысы тікелей байланысты жалғастырып, жақын уақытта қайта телефон арқылы сөйлесуге келісті.
