Сурет: traceca-org.org
Ақтау теңіз портында акваторияны тереңдету жұмыстары жоспар бойынша жүріп жатыр, деп хабарлайды Zhaiyqmedia.kz ақпарат агенттігі. Бұл ірі инфрақұрылымдық жоба Транскаспий халықаралық көлік бағытының өткізу қабілетін арттырып, Қазақстанның Шығыс пен Батыс арасындағы маңызды транзиттік хаб ретіндегі рөлін күшейтуге бағытталған.
Көлік министрлігінің мәліметінше, жоба теңіздегі кеме қатынасының қауіпсіздігін жақсартып, Транскаспий халықаралық көлік бағытының (ТХКБ) өткізу мүмкіндігін едәуір арттырады. Қазір бас мердігер – China Harbour Engineering Company Ltd. компаниясы геодезиялық зерттеулерді толық аяқтап, деректерді өңдеген. Бұл негізгі құрылыс кезеңіне өтуге мүмкіндік береді.
Дайындық барысында арнайы су түбін тереңдететін флот, техника мен жабдықтар Ақтау портына жеткізілуде. Жасанды үйінді алаңында қорғаныс бөгетін салу жұмысы да басталды. Бүгінге дейін жалпы ұзындығы 785 метр болатын бөгеттің 680 метрі тұрғызылды. Негізгі тереңдету жұмыстары шілде айының екінші жартысында басталады деп күтілуде. Биылғы жылдың соңына дейін жобаны толық аяқтау жоспарланған.
Жоба іске асқаннан кейін порт акваториясындағы рұқсат етілетін шөгу тереңдігі 6–7 метрге дейін ұлғаяды. Нәтижесінде кемелер толық жүк тиеп қатынай алады. Бұл жүк тиеу-түсіру жұмыстарының тиімділігін арттырып, порттың жалпы өнімділігін едәуір көтереді.
Мамандардың пікірінше, жоба Транскаспий халықаралық көлік бағытының дамуына жаңа серпін береді. Жоспар бойынша, 2028 жылға қарай дәліздің жылдық өткізу қабілеті қазіргі 6 миллион тоннадан 10 миллион тоннаға дейін артады. Бұл Қазақстанның Еуропа мен Қытай арасындағы маңызды транзиттік көпір ретіндегі рөлін нығайтып, халықаралық жүк тасымалы нарығындағы бәсекелік мүмкіндігін арттырады.
Транскаспий бағытының маңызы жыл сайын өсуде. Биылғы бес айдың қорытындысы бойынша, осы дәліз арқылы Қытайдан Еуропаға бағытталған контейнерлік тасымал көлемі өткен жылдың сәйкес кезеңімен салыстырғанда 30 пайызға көбейген.
Ақтау портын жаңғырту жобасы еліміздің көлік-логистика саласын дамытуға арналған кешенді саясаттың маңызды бөлігі болып табылады. Порт инфрақұрылымының жаңаруы халықаралық тасымалдың сенімділігін күшейтіп қана қоймай, Каспий арқылы өтетін дәліздің экономикалық тартымдылығын да арттырады.
