Сурет: kazgazeta.kz
Биылдан бастап Қазақстандағы жыл бойы жұмыс істейтін және маусымдық балалар демалыс орталықтары лицензиялау арқылы ғана жұмыс істейтін болады. Бұл талап балалардың қауіпсіздігі мен сапалы демалуын қамтамасыз ету үшін енгізілді, деп хабарлайды Zhaiyqmedia.kz ақпарат агенттігі.
Оқу-ағарту министрі Ғани Бейсембаевтың айтуынша, жаңа жүйе демалыс орындарының жұмысын реттеп, балаларға қауіп төндірмейтін жағдай жасайды. Енді әрбір демалыс орталығы міндетті түрде лицензия алуы керек.
«Біз балалардың жазғы демалысын ұйымдастыруда сапа мен қауіпсіздікті бірінші орынға қоямыз. Лицензиялау – бұл талапқа сай келмейтін орындардың жұмыс істеуіне жол бермеудің тиімді тәсілі», – деді министр.
Жаңа талаптарға сәйкес, демалыс орталықтарының материалдық-техникалық базасы, мамандардың біліктілігі және балалардың қауіпсіздігі қатаң тексеріледі. Лицензиясыз жұмыс істегендерге айыппұл салынады.
Былтыр елімізде 10 мыңнан астам бала әртүрлі демалыс лагерлерінде демалады. Биыл бұл көрсеткішті арттыру жоспарланып отыр.
