Қазақстандағы ең ірі көмір өндіруші компаниялардың бірі — «Қаражыра» АҚ халыққа көмірді қымбат бағамен сатқан. Бұл туралы Бәсекелестікті қорғау және дамыту агенттігі (БҚДА) жүргізген тергеу мен Жоғарғы соттың шешімінде айтылды, деп хабарлайды ZhaiyqMedia.kz.

Жоғарғы сот Қаражыраның үстемдік жағдайын теріс пайдаланғанын растады

БҚДА тергеу барысында «Қаражыра» АҚ-ның тұрмыстық-коммуналдық қажеттіліктер үшін сатылатын көмірге монополиялық жоғары баға қойғанын анықтады. Агенттік сарапшылары бұл әрекетті компанияның нарықтағы үстемдігін теріс пайдалану ретінде бағалады.

Алайда компания тергеудің заңдылығына күмән келтіріп, ҚР Кәсіпкерлік кодексінің 216-бабына сүйене отырып, БҚДА-ның әрекетіне қарсы шағымданды. Соған қарамастан, Жоғарғы сот агенттік дәлелдерін орынды деп танып, «Қаражыра» АҚ-ның көмір нарығында монополиялық жағдайға ие екенін ресми түрде растады.

«Қаражыра» компаниясы туралы не білеміз?

«Қаражыра» АҚ — Қазақстандағы ең ірі көмір компанияларының бірі. Ол Абай облысындағы Қаражыра көмір кен орнында жұмыс істейді. Forbes.kz деректері бойынша, 2023 жылы компания 7,9 млн тонна көмір өндірген.

Негізгі акционерлер:

• Эдуард Огай — 20,1% (капиталы $761 млн, Forbes Kazakhstan)

• Владимир Джуманбаев — 20% (капиталы $472 млн)

• Ерлан Нигматулин — 10%

• Владислав Огай — 24,95%

• Элина Огай — 24,95%

Қаржылық көрсеткіштер:

Kursiv.media мәліметі бойынша:

• 2023 жылғы таза пайда — 3,1 млрд теңге

• 2022 жылғы таза пайда — 9,3 млрд теңге

• 2023 жылғы кірістер — 58,4 млрд теңге

• Жалпы активтер — 67,8 млрд теңге

Компания өнімінің 77,2%-ын ішкі нарыққа, ал 22,7%-ын экспортқа шығарады. Негізгі экспорт бағыттары — Қырғызстан (15,9%) және Ресей (6,5%).