Сурет: Egemen Qazaqstan
Л.Н. Гумилев атындағы Еуразия ұлттық университеті (ЕҰУ) мен Ресейдің Бүкілресейлік сыртқы сауда академиясы (БССА) арасында ынтымақтастық туралы меморандумға қол қойылды. Бұл құжат екі оқу орнының білім және ғылым саласындағы байланысын нығайтуға бағытталған, деп хабарлайды Zhaiyqmedia.kz ақпарат агенттігі.
Меморандум аясында студенттер мен оқытушылар алмасу, бірлескен ғылыми жобалар жүргізу және тәжірибе алмасу көзделген. ЕҰУ ректоры Ерлан Сыдықовтың айтуынша, бұл ынтымақтастық қазақстандық студенттерге халықаралық деңгейде білім алуға мүмкіндік береді.
«Біздің мақсатымыз – студенттерге сапалы білім беру және олардың бәсекеге қабілеттілігін арттыру. БССА-мен әріптестік осы жолдағы маңызды қадам», – деді ректор.
БССА ректоры Сергей Синельников-Мурылев те екіжақты байланыстың маңыздылығын атап өтті. Ол академияның ЕҰУ-мен бірлесіп, экономика және құқық саласында білікті мамандар даярлауға дайын екенін жеткізді.
Қазіргі уақытта ЕҰУ әлемнің 40-тан астам елінің университеттерімен ынтымақтасады. Жаңа келісім білім беру бағдарламаларын жаңартып, ғылыми зерттеулердің ауқымын кеңейтуге септігін тигізеді.
