Мемлекет басшысы Қасым-Жомарт Тоқаев сумо спортының отаны Жапонияда зор жетістікке жетіп, ел мерейін үстем еткен қазақстандық балуан Ерсін Балтағұлды қабылдады, деп хабарлайды Zhaiyqmedia ақпарат агенттігі.
Президент спортшыны былтырғы айтулы жеңісімен құттықтады. Ол Император кубогын иеленіп, сумодағы ең жоғары дивизион саналатын «маэгашира» дәрежесіне қол жеткізген болатын. Сондай-ақ жарыс қорытындысы бойынша «Канто-се» (жауынгерлік рухы үшін) арнайы жүлдесімен марапатталған еді.
Қасым-Жомарт Тоқаев бұл жетістік қажырлы еңбек пен табандылықтың жемісі екенін атап өтіп, шетелде Қазақстанның атын шығарып жүрген жастардың көбейгеніне тоқталды. Мемлекеттің талантты азаматтар мен спортты қолдауға әрдайым ерекше көңіл бөлетінін жеткізді.
– Жапонияға барған сапарымда сізді Императордан бастап қарапайым халыққа дейін бәрі танитынын, құрметтейтінін байқадым. Бұл – зор мәртебе. Жапонияда тұрсаңыз да қазақтың атын шығарып, еліміздің беделін биіктетіп жүрсіз. Сізге ерекше ризашылығымды білдіремін, – деді Мемлекет басшысы.
Өз кезегінде Ерсін Балтағұл Президентке ілтипаты үшін алғыс айтып, алдағы уақытта еліміздегі жас спортшылармен кездесіп, тәжірибесімен бөлісуді жоспарлап отырғанын жеткізді.
– Қазақстан азаматы ретінде мақсатымыз – еліміздің көк туын 120 миллионнан аса халқы бар Жапонияға таныту еді. Осы бағыттан таймай, еңбек етіп келеміз. Осы сәтті пайдаланып, Өзіңізді және барша қазақстандықтарды отандасымыз Михаил Шайдоровтың айтулы жетістігімен құттықтаймын, – деді Ерсін Балтағұл.
Кездесу соңында Қасым-Жомарт Тоқаев балуанға алдағы жарыстарда да жоғары нәтижелер тілеп, Қазақстан мен Жапония арасындағы достықты нығайтуға үлес қоса беруіне тілектестік білдірді.
Фото: t.me/aqorda_resmi
