Ресей Армениядағы әскери қатысуын күшейтуде, бұл әрекет Әзербайжанмен арадағы шиеленіс аясында жағдайды одан әрі дестабилизациялауы мүмкін. Бұл туралы Украина Қорғаныс министрлігінің Бас барлау басқармасы (ГУР) мәлімдеді.

Украина барлау қызметінің дерегінше, Мәскеу жақында Арменияның Гюмри қаласындағы ресейлік әскери базаны жасақтауды жеделдеткен. Бұл қадам Ресейдің Оңтүстік Кавказ аймағына әскери-саяси қысымды арттыру стратегиясының бір бөлігі саналады.

«Ресей әскерінің Арменияда орналастырылуы — Кремльдің жаһандық қауіпсіздік жағдайын тұрақсыздандыруға бағытталған кешенді стратегиясының бір бөлігі. Мәскеу ұлтаралық жанжалды қоздырумен қатар, Кавказда әскери қатысуын күшейтіп отыр. Ресей мен Әзербайжан арасындағы қатынастың ушығуы алдын ала дайындалған болуы мүмкін», — деді Украина барлау өкілі Андрей Юсов.

Контекст:

• Гюмридегі базаға Ресейдің Ростов, Волгоград облыстары мен Қырымда әскери қызмет өткеріп жатқан әскерилер жіберіліп жатыр.

• Сонымен қатар, Ресей Солтүстік Осетия мен Адыгей өңірлерінен еріктілерді де тартып жатқаны мәлім болды.

Жанжалдың алғышарттары:

27 маусымда Ресейдің Екатеринбург қаласында Әзербайжаннан шыққан бірнеше азамат ұсталып, екеуі қаза тапқан. Ресей билігі олардың өлімін «жүрек жеткіліксіздігімен» түсіндірсе, Баку сараптамасы олардың жарақаттан көз жұмғанын көрсетті. Осыған жауап ретінде Әзербайжанда Ресей азаматтары, соның ішінде Sputnik агенттігінің өкілдері де ұсталғаны хабарланды.

Түркия президенті екі тарапты сабырға шақырып, шиеленісті ушықтырмауға үндеген болатын.