Қазақстандық кәсіпқой боксшы Виктор Темиров (9-0, 6 КО) германиялық Доменик Арнольдпен (5-0, 2 КО) әлем чемпионы атағы үшін жұдырықтасады. Жекпе-жек алдында боксшылар баспасөз мәслихатында кездесіп, алғашқы көз арбасу рәсімін өткізді, деп хабарлайды Zhaiyqmedia ақпарат агенттігі.
Бокс кеші Германияның Бад-Херсфельд қаласында өтеді. 7 ақпанда Темиров пен Арнольд орта салмақта WBF тұжырымы бойынша әлем чемпионы атағын сарапқа салады.
Жекпе-жекке екі күн қалғанда өткен баспасөз мәслихатынан Виктор Темиров Instagram парақшасында бірнеше сурет жариялап, жазба қалдырды.
«Баспасөз мәслихаты өтті. Ертең салмақ өлшейміз. Ал, кеттік, мен дайынмын», – деп жазды спортшы.
Виктор Темировтың рингтегі лақап аты – «Қасапшы». Алайда, неміс жанкүйерлері оны кәсіпқой мансабын дәл осы Германияда бастап, даңққа жеткен Геннадий Головкиннің жас кезіне жиі ұқсатады.
Фото: Әлеуметтік желіден
