АҚШ президенті Дональд Трамптың әкімшілігі Киевке қысымды күшейтіп, Ресеймен бейбіт келісімге келу үшін Украинаны аумағының бір бөлігінен бас тартуға мәжбүрлеп отыр. Financial Times басылымының жазуынша, Вашингтон Украинаға қауіпсіздік кепілдігін тек жерінің бір бөлігінен бас тартса ғана беретінін ашық меңзеген, деп хабарлайды Zhaiyqmedia ақпарат агенттігі.
Әңгіме, ең алдымен, Кремль көптен бері көздеп отырған Донбасс туралы. Басылыммен сөйлескен дереккөздердің айтуынша, Ақ үйдегілер бұл соғысты тоқтатудың «бағасы» деп санайды. Бұл Вашингтонның Украинаның ұстанымына қарамастан, Владимир Путиннің талаптарымен белгілі бір деңгейде келісуге дайын екенін білдіреді.
Алайда ресми Киев мұндай шартпен мүлдем келіспейді. Украина өз аумағынан өз еркімен бас тартпайтынын мәлімдеді. Қазіргі уақытта украин әскері Донбасс аумағының шамамен 20 пайызын бақылауда ұстап отыр.
Бұған дейін Украина президенті Владимир Зеленский АҚШ-пен қауіпсіздік кепілдіктері туралы құжат «100 пайыз дайын» екенін, тек қол қою ғана қалғанын айтқан еді. Алайда АҚШ-тың араласуымен Әбу-Дабиде өткен Украина мен Ресей келіссөздерінен кейін де бұл мәселе шешілген жоқ.
«Аумақтарға қатысты біздің ұстанымымыз түбегейлі әртүрлі», — деп мәлімдеді Зеленский.
