Сурет: Видеодан скрин
Астанадағы Лесозавод ауданында орналасқан теміржол өткелінде №30 бағыттағы қоғамдық көлік пойызбен соқтығысты. Полиция автобус жүргізушісін әкімшілік жауапкершілікке тартты, деп хабарлайды Zhaiyqmedia.kz ақпарат агенттігі.
Елордалық полиция департаментінің баспасөз қызметінің мәліметінше, «Iveco» автобусының жүргізушісі Тайбурыл көшесіндегі теміржол өткелінен өткен кезде тепловозға жол бермеген.
«Апат салдарынан автобус инерциялық жағдайда Hyundai автокөлігімен соқтығысты. Жол-көлік оқиғасында зардап шеккендер жоқ. Осы факті бойынша автобус жүргізушісі әкімшілік жауапкершілікке тартылды», делінген хабарламада.
Бұл іс Әкімшілік құқық бұзушылық туралы кодекстің 607-бабының 3-бөлігі бойынша тіркелген. Аталған бап теміржол өткелдерінен өту қағидаларын бұзуға қатысты. Автобус жүргізушісі 9 ай мерзімге көлік жүргізу құқығынан айырылуы мүмкін.
