Қазақстанда көші-қон саясаты түбегейлі өзгеріп, бұрынғы әкімшілік құралдан экономиканы дамытудың маңызды тетігіне айналмақ. Бұл туралы Премьер-Министрдің орынбасары Аида Балаева мәлімдеді, деп хабарлайды Zhaiyqmedia.kz ақпарат агенттігі.
Вице-премьердің айтуынша, жаңа тәсіл елге келетін және кететін адамдар ағынын реттеп қана қоймай, сонымен бірге білікті кадрларды тарту мен ішкі еңбек ресурстарын тиімді пайдалануға басымдық береді.
«Біз көші-қонды тек бақылау объектісі ретінде қараудан бас тартамыз. Енді бұл – экономикалық өсуді ынталандыратын құрал. Шетелден мамандар тарту, отандастардың қайта оралуына жағдай жасау – басты бағыттардың бірі», – деді Балаева.
Сондай-ақ ол ішкі көші-қонды реттеу үшін өңірлердің экономикалық мүмкіндіктерін ескеретін жаңа тетіктер енгізілетінін атап өтті. Атап айтқанда, еңбек ресурстары тапшы аймақтарға кадрларды бағыттау жоспарланған.
Жаңа саясат шеңберінде шетелдік жұмыс күшін тартудың жеңілдетілген тәртібі де қарастырылып жатыр. Бірақ бұл жергілікті кадрлардың мүддесіне нұқсан келтірмеуі тиіс.
