Әлеуметтік желіде әйелдерге арналған тренингте коучтың қатысушыларды балағат сөздер айтуға үйреткен видео тарап кетті. Полиция бұл факті бойынша тексеріс жүргізіп, коучты жауапқа тартты, деп хабарлайды Zhaiyqmedia.kz ақпарат агенттігі.
Видеода коуч әйелдерге эмоцияларын балағат сөздермен білдіруді үйреткен. Қатысушылар да оны қайталап, бейәдеп сөздер айтқан. Бұл әлеуметтік желі қолданушыларының наразылығын тудырды.
«Біз бұл оқиға бойынша дереу тексеріс бастадық. Коучтың әрекеттерінен қоғамдық тәртіпті бұзу белгілері анықталды. Қазіргі уақытта оған қатысты әкімшілік іс қозғалды», — деді Алматы полиция департаментінің өкілі.
Коучтың жеке басы анықталды. Ол өз кінәсін мойындамай отыр. Алайда полиция оның әрекеттерінде «Ұсақ бұзақылық» бабы бойынша құқық бұзушылық белгілерін көріп отыр. Егер кінәсі дәлелденсе, оған айыппұл салынуы немесе 15 тәулікке қамауға алынуы мүмкін.
