Иранның шабуылы салдарынан Катар сұйытылған табиғи газ (СТГ) экспорттау қуатының 17%-нан айырылды. Бұл жағдай компанияға жыл сайын шамамен 20 миллиард доллар шығын әкеліп, Еуропа мен Азияға газ жеткізуді қатерге тігіп отыр, деп хабарлайды Zhaiyqmedia ақпарат агенттігі.
Бұл туралы QatarEnergy мемлекеттік мұнай-газ компаниясының бас директоры әрі энергетика жөніндегі мемлекеттік министр Саад әл-Кааби Reuters агенттігіне берген сұхбатында мәлімдеді.
Оның айтуынша, зақымданған нысандарды жөндеу жұмыстарына үш жылдан бес жылға дейін уақыт кетеді. Осы кезеңде жылына 12,8 миллион тонна СТГ өндірісі тоқтайды.
Бұдан бөлек, Катардан экспортталатын конденсат көлемі шамамен 24%-ға, сұйытылған мұнай газы (СМГ) 13%-ға азаяды. Сонымен қатар гелий өндірісі – 14%-ға, ал нафта мен күкірт – 6%-ға қысқарады. Бұл шығындардың салдары әлемдік нарықта айқын сезіледі: мысалы, Үндістандағы мейрамханалар сұйытылған газды пайдаланса, Оңтүстік Кореяның микрочип өндірушілері гелийге тәуелді.
Мұнай-газ саласының сарапшысы Джон Кемп бұл жағдай әлемдік газ тапшылығына әкеп соғатынын болжайды.
«Қысқа және орта мерзімді перспективада катарлық газдың орнын басатын балама жоқ», – дейді ол.
Фото: Әлеуметтік желіден
