Биыл жазда балалардың демалысы қауіпсіз әрі сапалы өтуі тиіс. Бұл – үкіметтің басты талабы. Мәдениет және ақпарат министрі Аида Балаева ведомствоаралық комиссия отырысында жазғы лагерьлер мен ойын алаңдарына қатаң бақылау орнату керектігін айтты, деп хабарлайды Zhaiyqmedia.kz ақпарат агенттігі.
Министрдің айтуынша, жазғы демалыс кезінде балалардың қауіпсіздігіне ерекше көңіл бөлу қажет. Әсіресе, су айдындары мен жолдардағы жазатайым оқиғаларды болдырмау маңызды.
«Балалардың жазғы демалысын ұйымдастыру – мемлекеттің басты міндеттерінің бірі. Біз әрбір баланың қауіпсіз әрі пайдалы уақыт өткізуіне жағдай жасауымыз керек», – деді Аида Балаева.
Отырыста жергілікті әкімдіктерге жазғы лагерьлердің материалдық-техникалық базасын жақсарту және тәрбиешілердің біліктілігін арттыру тапсырылды. Сондай-ақ, балалардың тамақтану сапасы мен медициналық қызмет көрсету деңгейіне баса назар аударылмақ.
Биыл елімізде 10 мыңнан астам жазғы лагерь жұмыс істейді. Олардың басым бөлігі мектеп жанынан ашылады. Облыс әкімдіктері жазғы демалыс маусымына дайындықты мамыр айының соңына дейін аяқтауы тиіс.
