Мемлекет басшысы Қасым-Жомарт Тоқаев Тұңғыш Президент Нұрсұлтан Назарбаевтың мемлекет дамуына қосқан үлесін атап өтіп, соңғы 30 жылдағы жетістіктерде қазіргі Конституцияның рөлі ерекше екенін айтты, деп хабарлайды Zhaiyqmedia ақпарат агенттігі.
Президент қазіргі Ата заңның тарихи маңызын жоққа шығаруға болмайтынын, бірақ уақыт талабына сай өзгерістер қажет екенін жеткізді.
«Соңғы 30 жылда еліміздің барлық жетістігінде зор рөл атқарған қазіргі Конституцияның маңызын жоққа шығаруды ешкім мақсат етіп отырған жоқ. Бұл ретте Тұңғыш Президент Нұрсұлтан Әбішұлы Назарбаевтың еңбегі зор», – деді Тоқаев.
Сонымен қатар Мемлекет басшысы Ата заңның Тәуелсіздіктің алғашқы жылдарында, ел енді еңсесін тіктеп жатқан кезде қабылданғанын еске салды. Оның айтуынша, содан бері Қазақстан айтарлықтай өзгеріп, халықаралық беделі жоғары, қуатты мемлекет ретінде қалыптасты.
«Бүгінде әлемде түбегейлі геосаяси, геоэкономикалық, технологиялық өзгерістер болып жатыр. Соңғы жылдары Қазақстан да ұлттық сана-сезімге әсер еткен, тіпті қатты дүмпу тудырды деуге болатын үлкен өзгерістерді бастан өткерді. Сондықтан біз үшін мақсаттарымызды, құндылықтарымыз бен қағидаттарымызды жаңартып, оны конституциялық деңгейде бекіту аса маңызды», – деп түйіндеді сөзін Мемлекет басшысы.
Фото: Әлеуметтік желіден
