2 тамыз күні Жалпақтал ауылында өңір басшысы Нариман Төреғалиұлының бастамасымен жүзеге асып жатқан «Қаладан – ауылға» өңірлік бағдарламасы аясында қаладан көшіп келген медицина саласы мамандарына тұрғын үй кілттері салтанатты түрде табысталды. Аталған іс-шараға Батыс Қазақстан облысы әкімінің орынбасары Тлепберген Каюпов, Казталов ауданының әкімі Асланбек Сарқұлов, облыстық қаржы басқармасының басшысы Нұрлан Есенғалиев, облыстық денсаулық сақтау басқармасының басшысы Мадияр Өтешев, облыстық жұмыспен қамтуды үйлестіру және әлеуметтік бағдарламалар басқармасының басшысы Бақберген Абуов, ардагерлер, денсаулық сақтау саласының мамандары және ауыл тұрғындары қатысты.
Жаңа баспаналардың кілтін табыстау рәсімінде БҚО әкімінің орынбасары Тлепберген Ерсайұлы Каюпов, жобаның маңыздылығына тоқталып, ауылға келіп еңбек етіп жатқан мамандарға алғысын білдіріп, қуаныш иелеріне тұрғын үйлердің кілтін табыстады.
– Мемлекет басшысының ауылдарды дамыту жөніндегі тапсырмаларын жүзеге асыру аясында өңірімізде 2024 жылы облыс әкімі Нариман Төреғалиұлының бастамасымен «Қаладан – ауылға» жобасы іске қосылды. Жобаның негізгі мақсаты – қалада тұратын ауыл азаматтарын туған ауылына қайта оралту арқылы ауылдық елді мекендердің әлеуметтік-экономикалық әлеуетін арттыру, кадр тапшылығы мәселесін шешу. Аталған жоба аясында өткен жылы облыс бойынша 42 тұрғын үй берілсе, биылғы жылдың басынан бері 16 баспана сатып алынды. Бұл – ауылдағы инфрақұрылымды дамыту мен сапалы адам ресурстарын тартудағы жүйелі қадамдардың нақты нәтижесі. Алдағы уақытта бұл бағыттағы жұмыстар жалғасын табатын болады, — деді облыс әкімінің орынбасары.
Сонымен қатар ауылдық ардагерлер кеңесінің төрағасы Ғилым Шәріпұлы Едекешов және Қостанай облысы, Денисов ауданынан келген жалпы тәжірибелі дәрігер Ерболат Бақытжанұлы Босынбеков өздерінің жүрекжарды лебіздерін білдірді.
Мемлекет басшысы Қасым-Жомарт Кемелұлы: «Медицина қызметкерлерінің еңбегі – елдің саулығының кепілі. Ауылдық жерлерде дәрігерлерді тұрғын үймен қамтамасыз ету – олардың кәсіби дамуына ғана емес, ауыл халқының денсаулығын жақсартуға да тікелей әсер етеді. Мемлекет дәрігерлердің әлеуметтік жағдайын жақсартуды жалғастыра береді», – деген болатын. Қабілетті жастарға қай кездеде сұранысқа жоғары екенін әркез үнемі ерекше атап келеді. Президентіміздің тапсырмасына сәйкес ауылдық жерлердегі медициналық инфрақұрылымды күшейту бағытында ауқымды жұмыстар атқарылуда.
Жалпақтал ауылындағы баспаналар Ақтөбе қаласындағы М.Оспанов атындағы медицина университетін тәмамдаған жерлесіміз, жалпы тәжірибелі дәрігер Асылзада Құмар, Қызылорда облысы, Байқоңыр қаласынан келген реаниматолог-анестезиолог Асылхан Шакизадаев, Тараз қаласынан келген акушер-гинеколог Мөлдір Ибрагимова, Қостанай облысы, Денисов ауданынан келген жалпы тәжірибелі дәрігер Ерболат Босынбековке берілді.
2024 жылдың қорытындысы бойынша, жоба аясында Казталов ауданына 19 отбасы немесе 106 адам ауданға қоныс аударған. Ауданға көшіп келген 2 отбасында нәресте дүниеге келді. Көшіп келген отбасылардың 18-іне жаңа баспана, 1 отбасына ауыл тұрғындарының көмегімен жөнделген үй берілді. Барлығы тұрғын үй кезегіне қойылып, ресми тіркеуден өткізілді.
Биыл «Қаладан-ауылға» өңірлік жобасы аясында табысталып отырған Жалпақтал ауылындағы алғашқы баспаналардың құрылыс жұмыстарын мердігер, жеке кәсіпкер Асхат Жұманов жүргізді.
Казталов ауданы әкімдігінің баспасөз қызметі
