Сурет: видеодан алынған кадр
Астанада Президент саябағының жаяу жүргіншілер жолымен көлік жүргізген жүргізуші әкімшілік жауапкершілікке тартылып, сот оны 10 тәулікке қамауға алды, деп хабарлайды Zhaiyqmedia.kz ақпарат агенттігі.
Мамандандырылған ауданаралық әкімшілік құқық бұзушылықтар жөніндегі соттың мәліметінше, жүргізуші түнде Kia Rio көлігімен саябақтағы жаяу жүргіншілер жолына шығып, адамдардың қауіпсіздігіне қатер төндірген. Ол бұл әрекетін саналы түрде жасап, әлеуметтік желіде бейнежазба жариялаған.
Құқықбұзушы кінәсін мойындағанымен, тротуарға әдейі шықпағанын және көлік қозғалысына тыйым салынғанын білмегенін айтқан. Оқиғаны оның танысы телефонға түсірген. Тексеру барысында ер адамның жүргізуші куәлігі мен қажетті құжаттары болмағаны анықталған.
Сот оның бұрын да бірнеше рет әкімшілік жауапкершілікке тартылғанын ескеріп, 10 тәулікке қамауға алу туралы шешім шығарды. Көлік коммуналдық тұраққа қойылды.
