«Қазгидромет» РМК 2026 жылдың 1 ақпанына арналған ауа райы болжамын жария етті. Синоптиктердің мәліметінше, еліміздің басым бөлігінде күн құбылмалы болады, ал кей өңірлерде жауын-шашын, көктайғақ пен тұман күтіледі, деп хабарлайды Zhaiyqmedia ақпарат агенттігі.
Солтүстік Қазақстан, Ақмола және Павлодар облыстарында жауын-шашынсыз, аздап бұлтты күн болады. Ауа температурасы түнде -13…-21 градусқа дейін төмендейді. Ал Қостанайда түнде және таңертең аздап қар жауып, тұман түседі.
Еліміздің орталығында да күн ашық болады. Қарағандыда жауын-шашын күтілмейді, күндіз -3…-5 градус. Алайда Жезқазғанда жаңбыр аралас қар жауып, көктайғақ болуы ықтимал.
Шығыс Қазақстанда, атап айтқанда Өскемен мен Семейде, күн ашық, бірақ түнде және таңертең тұман сақталады. Ауа температурасы түнде -13…-18 градус аралығында болады.
Батыс аймақтарда ауа райы әртүрлі. Оралда күндіз жаңбыр мен қар жауып, бұрқасын соғып, көктайғақ болады. Атырау мен Ақтөбеде жауын-шашынсыз, бірақ тұман күтіледі. Ал Маңғыстау облысының орталығы Ақтауда күн ашық, ауа температурасы +7 градусқа дейін жылынады.
Оңтүстік өңірлерде де жылы ауа райы сақталады. Шымкентте түнде және таңертең жаңбыр жаууы мүмкін, күндіз +11…+13 градус. Түркістанда жаңбыр аралас қар жауып, көктайғақ болады. Тараз бен Қызылордада да жауын-шашын мен тұман күтіледі.
Алматыда күн жауын-шашынсыз, күндіз +4…+6 градус жылы. Астанада да күн ашық, бірақ аязды: түнде -16…-18, күндіз -5…-7 градус болады.
