Пәкістан Премьер-министрі Шахбаз Шариф Исламабадқа ресми сапармен барған Қазақстан Президенті Қасым-Жомарт Тоқаевты қабылдап, екі ел арасындағы стратегиялық серіктестікті нығайтуға мүдделі екенін жеткізді, деп хабарлайды Zhaiyqmedia ақпарат агенттігі.
Шахбаз Шариф Қасым-Жомарт Тоқаевқа арнайы уақыт бөліп келгені үшін алғыс айтып, Пәкістан үкіметі мен халқының атынан ыстық ықыласын білдірді.
– Қазақстан – біздің стратегиялық серіктесіміз. Достығымызды нығайтып, экономиканың түрлі бағыттарында, саясат, қорғаныс салаларында сенімді серіктестік орнату, сондай-ақ сауда дәліздерін қалыптастыру мақсатында Қазақстан Үкіметімен тығыз қарым-қатынаста жұмыс істегіміз келеді. Бұған күмәніңіз болмасын, – деді Пәкістан Премьер-министрі.
Оның айтуынша, Пәкістан мен Қазақстанның сауда-экономикалық ынтымақтастықты, оның ішінде энергетика, өнеркәсіп, ауыл шаруашылығы, көлік және цифрландыру салаларындағы әріптестікті дамытуға зор әлеуеті бар. Осыған байланысты үкімет басшысы екіжақты қарым-қатынастың барлық бағыты бойынша нақты әрі елеулі ілгерілеу қажет екеніне назар аударды.
Келіссөз соңында Қасым-Жомарт Тоқаев пен Шахбаз Шариф екі ел халықтарының игілігі үшін көпқырлы ынтымақтастықты одан әрі тереңдетуге дайын екендерін растады.
Фото: Әлеуметтік желіден
