Мемлекет басшысының өкімімен Қаныш Асанханұлы Әбубәкіров Қазақстан Республикасы Қорғаныс министрінің бірінші орынбасары – Қарулы Күштер Бас штабының бастығы болып тағайындалды, деп хабарлайды Zhaiyqmedia ақпарат агенттігі.
Осылайша, бұл лауазымды атқарып келген Сұлтан Камалетдинов қызметінен босатылды.
48 жастағы Қаныш Әбубәкіров – Қазақстан Республикасы Қарулы Күштерінің Әскери академиясы мен Ұлттық қорғаныс университетінің түлегі. Ол өзінің әскери қызметін десанттық-шабуылдау батальонындағы барлау ротасының барлау тобы командирі болып бастаған.
Кейін 22750, 25744, 61993 әскери бөлімдерінің командирі, 61993 әскери бөлімі командирінің орынбасары – штаб бастығы қызметтерін атқарды.
Әр жылдары Аэромобильді әскерлер қолбасшысының орынбасары, Құрлық әскерлері Десанттық-шабуылдау әскерлері қолбасшысының бірінші орынбасары – штаб бастығы, «Батыс» өңірлік қолбасшылығының және Құрлық әскерлерінің Десанттық-шабуылдау әскерлерінің қолбасшысы болды.
Жаңа қызметке тағайындалғанға дейін, яғни 2024 жылдың 4 қаңтарынан бастап Қаныш Әбубәкіров Қорғаныс министрінің орынбасары қызметін атқарды.
Фото: gov.kz
