Қызылорда қаласында Президент Қасым-Жомарт Тоқаевтың төрағалығымен «Әділетті Қазақстан – Адал азамат» тақырыбындағы V Ұлттық құрылтайдың отырысы басталды, деп хабарлайды Zhaiyqmedia ақпарат агенттігі.
Сыр елінде өтіп жатқан алқалы жиынға Ұлттық құрылтай мүшелері, Парламент депутаттары, орталық мемлекеттік органдардың басшылары, қоғам белсенділері мен сарапшылар қатысып жатыр.
Бұл – Түркістан, Семей және Атырау қалаларынан кейін өткізіліп отырған бесінші құрылтай. Биылғы жиынның негізгі мақсаты – қоғамдық құндылықтарды жаңғырту, ұлттық бірегейлікті нығайту және еліміздің алдағы даму бағыттарын талқылау.
Күн тәртібінде қоғамдық-саяси, әлеуметтік-экономикалық және мәдени-гуманитарлық салалардағы өзекті мәселелер қаралады деп күтілуде. Мемлекет басшысы жиын барысында бірқатар маңызды бастама көтеріп, нақты тапсырмалар береді деп жоспарланған.
Фото: Ақорда
