Қала әкімдігінің жоспарына сәйкес биыл Арман шағынауданында төрт көшеге жаңа жолдар салу жұмыстары басталды. Аталған көшелер қатарында М. Шоқай, Ермеков, Күсіпқалиев және Е. Қасаболатов көшелері бар. Қазіргі уақытта М. Шоқай көшесінде негізгі жол қабатын дайындау жұмыстары белсенді жүріп жатыр.

Жол құрылысын кезең-кезеңімен жүргізу қарастырылған. Алдымен жолдың тірек қабаты төселеді, содан кейін асфальт жабындысы салынады. Бұл тәсіл жолдың сапасын арттыруға және ұзақ мерзімге қызмет етуін қамтамасыз етуге мүмкіндік береді.

Қала әкімдігі тұрғындарға жол жөндеу жұмыстары кезінде қауіпсіздікті сақтау мен қозғалысқа уақытша шектеулерге түсіністік танытуды сұрайды. Жобаны толық аяқтау мерзімі – биылғы жылдың соңына дейін.

Жол құрылысының аяқталуы Арман шағынауданының инфрақұрылымын жақсартуға және тұрғындардың көлік қатынасы мен күнделікті тұрмысын жеңілдетуге бағытталған.

Сурет: Орал қ. әкімдігі