Қазақстанда жоғары білім қымбаттап кетті. Ұлттық статистика бюросының дерегінше, биылғы бірінші тоқсанда оқу ақысы өткен жылмен салыстырғанда айтарлықтай өскен, деп хабарлайды Zhaiyqmedia.kz ақпарат агенттігі.
Ең қымбат білім – медицина және халықаралық қатынастар саласында. Мысалы, Назарбаев Университетінде оқу жылына 7,6 миллион теңге тұрады. Ал Қазақстан-Британ техникалық университетінде (ҚБТУ) баға 5,9 миллион теңгеге жеткен.
«Бағаның өсуіне инфляция мен шығындардың көбеюі себеп болды. Білім сапасын сақтау үшін бізге қосымша қаржы қажет», – дейді оқу ордаларының өкілдері.
Мемлекеттік гранттар да өзгеріссіз қалмады. Биыл грант иелеріне төленетін сома 1,5 есеге ұлғайды, бірақ бұл ақылы бөлімде оқитындардың жағдайын жеңілдете алмай отыр. Енді көптеген отбасы баласының оқуына жылына 3–5 миллион теңге жұмсауға мәжбүр.
Мамандардың айтуынша, білім қымбаттаған сайын студенттер несие алуға немесе жұмыс істеуге мәжбүр болады. Бұл оқу үлгеріміне кері әсер етуі мүмкін.
