Солтүстік Қазақстан облысы Мағжан Жұмабаев ауданындағы Майбалық ауылында жеке тұрғын үй өртеніп, үш адамның өмірін қиды, деп хабарлайды Zhaiyqmedia ақпарат агенттігі.
Қайғылы оқиға 11 қаңтар күні кешке болған. Тілсіз жау шарпыған сәтте үйде отағасы мен оның екі кішкентай баласы болған. Үш жастағы және бір жастан жаңа асқан екі сәби әкесімен бірге оқиға орнында көз жұмды.
Ал балалардың анасы өрттен аман шыққан. Оның қалай құтқарылғанының мән-жайы қазір анықталып жатыр.
Төтенше жағдайлар департаментінің алдын ала мәліметі бойынша, өрттің неден шыққаны әлі белгісіз. Полиция адам өлімі дерегіне қатысты қылмыстық іс қозғады.
Ауыл тұрғындары отбасының ішімдікке салынғанын айтады, алайда бұл ақпарат әзірге ресми расталған жоқ.
Қазіргі уақытта тергеу амалдары жүріп жатыр.
