Мемлекет басшысы Қасым-Жомарт Тоқаев Жаңа жыл қарсаңында халыққа арнаған құттықтауында 2025 жылғы жетістіктерді атап өтті және 2026 жылға қатысты бірқатар маңызды жоспарды жария етті.
Оның мәлімдеуінше, өткен жылда экономика 6 пайыздан аса өсіп, алтын-валюта қоры 62 миллиард долларға жеткен. Бұл халық үшін тұрақтылық пен даму жолындағы елеулі көрсеткіштер саналады.
Бұл туралы Zhaiyqmedia.kz ақпарат агенттігі хабарлайды.
Президенттің айтуынша, 2025 жылы ауыл шаруашылығы мен инфрақұрылым саласы қарқынды дамыды. Диқандар екінші жыл қатарынан мол өнім алып, ауылды қолдауға 1 триллион теңге бағытталған.
Жол, темір жол құрылыстары да маңызды жетістіктердің қатарында: «Достық – Мойынты» теміржолының екінші желісі іске қосылып, еліміздің транзиттік мүмкіндіктері артты. Сонымен бірге 13 мың шақырым автожол жөнделіп, пайдалануға берілген.
2026 жылы не өзгереді және халық не күтеді?
Тоқаев алдағы жылы Цифрландыру мен Жасанды интеллект саласын дамыту басты бағыт болатынын ерекше атап өтті. Осыған байланысты 2026 жыл «Цифрландыру және жасанды интеллект жылы» деп жарияланды.
Сонымен қатар Президент Конституциялық реформаның маңызына тоқталып, бұл қадам Қазақстанның жаңғыру жолындағы жаңа кезеңіне негіз болатынына сенім білдірді.
Білім мен денсаулық сақтау салалары да назардан тыс қалмайды. Жүзден аса мектеп, екі жүзге жуық медициналық мекеме салынып, халыққа көрсетілетін қызмет сапасы артпақ. Ал мәдениет пен ғылым саласында қызмет етіп жүрген мамандарға қолдау жалғасады.
Президент еңбек адамдарының биыл бірінші рет аталып өткен «Жұмысшы мамандықтары жылында» бағаланғанын айтып, келер жылы да осындай бастамалар жалғасын табатынын жеткізді.
«Жылқы жылы» қандай үмітке толы?
Қасым-Жомарт Тоқаев келесі жыл – Жылқы жылына үлкен үміт артатынын жасырмады. Қазақ дәстүрінде жылқы жылы – жайлы, берекелі кезең саналады. Мемлекет алда агроөнеркәсіп, су ресурстары, логистика мен коммуналдық инфрақұрылымды дамытуда ауқымды жоспарларды жүзеге асырмақ.
Сондай-ақ Президент өңірлерде шағын және орта бизнесті дамыту, жаңа кәсіпорындар ашу, жол мен тұрғын үй салу, мектеп және спорт кешендерін тұрғызуға басымдық берілетінін айтты.
Жаңа технологияларды енгізу арқылы Қазақстанның әр саласы жаңара түспек. Ал жас ұрпаққа қолдау мен қамқорлық көрсету – мемлекет саясатының басым бағыты бола бермек.
