Шығыс Қазақстан облысында серіктестік басшысы 1 миллиард теңгеден астам сомаға пайдалы қазбаларды заңсыз өндіргені әшкере болды, деп хабарлайды Zhaiyqmedia ақпарат агенттігі.
Шемонаиха ауданындағы «Глинковское» кен орнында құрамында темірі бар тау-кен массасын заңсыз өндіруге қатысты тергеу аяқталды. Анықталғандай, ЖШС басшысының тек геологиялық барлау жұмыстарына ғана лицензиясы болған. Алайда ол осы рұқсатты желеу етіп, кенді өндіріп, өңдеп, оны Қазақстан ішінде және Қытайға сатып келген.
Тергеу мәліметінше, заңсыз өндірілген өнімнің жалпы көлемі 70 мың тоннадан асқан. Күдіктінің бұдан тапқан табысы 1 миллиард теңгеден көп.
Ол заңсыз ақшаға Алматыдан бизнес-орталық, пәтер, екі жер телімі мен көлік тұрағын және Land Rover көлігін сатып алған. Сот санкциясымен күдіктінің барлық мүлкіне тыйым салынды.
Фото: Әлеуметтік желіден
