Perplexity компаниясы өзінің жасанды интеллектіге негізделген іздеу жүйесінен жарнаманы алып тастайтынын мәлімдеді. Компания мұндай тәсіл қолданушының сеніміне нұқсан келтіреді деп санайды, деп хабарлайды Zhaiyqmedia ақпарат агенттігі.
Шын мәнінде, Perplexity осы салада чат-бот жауаптарымен қатар жарнаманы бірінші болып іске қосқан компаниялардың бірі еді. Енді олар бұл тәжірибеден толықтай бас тартып отыр.
«Чат ішіндегі жарнама қолданушы тәжірибесіне деген сенімді жоюы мүмкін», — делінген компания хабарламасында.
Бұл жаңалық жасанды интеллект нарығының монетизация мәселесінде екіге жарылғанын көрсетті. Мәселен, OpenAI жақында ChatGPT-де жарнаманы тест ретінде іске қосса, олардың бәсекелесі Anthropic компаниясы жарнамаға мүлдем қарсы екенін білдіріп, тіпті Super Bowl кезінде осы тәжірибені мазақ ететін ролик көрсеткен болатын.
