Ақмола облысының Бурабай ауданында кәсіпорын қызметкері қаңғыбас иттерді атпақ болып, байқаусызда әріптесін жаралады, деп хабарлайды Zhaiyqmedia ақпарат агенттігі.
Оқыс оқиға кәсіпорын аумағындағы қаңғыбас жануарларға «аңшылық» жасау кезінде болған. Ер адам итті көздеп атқан оғы мүлт кетіп, жанында тұрған әріптесінің аяғына тиген.
Зардап шеккен азамат шұғыл түрде Бурабай аудандық ауруханасына жеткізілді. Дәрігерлер оның жағдайын тұрақты деп бағалап отыр, өміріне төнген қауіп жоқ.
Бұл дерекке қатысты полиция бірден екі бап бойынша, яғни «Абайсызда денсаулыққа ауыр зиян келтiру» және «Жануарларға қатыгездік көрсету» бойынша сотқа дейінгі тергеуді бастады.
Оқ атылған қару тәркіленіп, қажетті тергеу амалдары жүргізіліп жатыр.
Фото: Әлеуметтік желіден
