Таяу Шығыстағы әскери қақтығыстың ушығуына байланысты Brent маркалы мұнайдың бір баррелінің бағасы 100 доллардан асып кетті, деп хабарлайды Zhaiyqmedia ақпарат агенттігі.
Сауда алаңдарының деректеріне сәйкес, бейсенбі күні мұнай бағасы бір сауда сессиясында 9%-дан астам өсіп, 100,97 долларға жеткен. Бір күн бұрын оның құны 2,9%-ға қымбаттап, 90,05 долларды құраған еді.
Мамыр айындағы фьючерстер 14,33%-ға (100,39 доллар), ал WTI маркалы мұнайдың сәуірдегі фьючерстері 9,26%-ға (95,33 доллар) қымбаттады.
Бағаның бұлайша күрт өсуіне Таяу Шығыстағы ахуал себеп болып отыр. АҚШ пен Израильдің соққыларынан кейін Иран аймақтағы америкалық әскери базалар мен негізгі энергетикалық нысандарға жауап ретінде соққы жасады.
Иранның Ормуз бұғазын бұғаттауы жағдайды одан сайын ушықтырды. Бұл бұғаз арқылы әлемдік мұнай сұранысының бестен бір бөлігі тасымалданады.
Saudi Aramco мұнай компаниясының басшысы Әмин Насер Ормуз бұғазының жабылуына байланысты туындаған дағдарысты осы сала тарихындағы ең ауқымдысы деп атады. Оның айтуынша, Таяу Шығыстан мұнай жеткізу көлемі азайып барады.
«Бес жылдық минимумда тұрған әлемдік қорлар енді «жеделдетілген қарқынмен» сарқылады», – деді ол.
Жақында Әбу-Дабиден батысқа қарай 240 шақырым жерде орналасқан Біріккен Араб Әмірліктерінің Рувайс қаласындағы ірі мұнай өңдеу зауытына ұшқышсыз ұшақтар шабуыл жасап, салдарынан өрт шыққаны да жағдайға әсер етті.
Фото авторы: Сергей Коньков/ДП
