Қазақстанның төрт бірдей облысында ауа райының күрт нашарлауына байланысты республикалық маңызы бар жолдарда көлік қозғалысына шектеу енгізілді, деп хабарлайды Zhaiyqmedia ақпарат агенттігі.
Батыс Қазақстан облысында сағат 15:00-ден бастап «Ақтөбе – Орал – РФ шекарасы» тасжолының 393-526 шақырымы (Жымпиты ауылынан Ақтөбе облысының шекарасына дейін) жүк және қоғамдық көліктер үшін жабық.
Дәл осындай шектеу Ақтөбе облысында да енгізілді. Мұнда аталған жолдың 526-702 шақырымында (Батыс Қазақстан облысының шекарасынан Маржанбұлақ ауылына дейін) қозғалыс тоқтатылды. Бұл бағыттағы жол шамамен 9 ақпан күні сағат 00:00-де ашылады деп жоспарланған.
Сонымен қатар сағат 16:30-дан бастап Алматы және Жамбыл облыстарында да жүк көліктері үшін жол жабылды. Нақтырақ айтқанда, «Қордай асуының жаңа айналма жолы» бөлігінде қозғалыс шектелді.
Шектеу Алматы облысы бойынша 59-143 шақырым (Жаңақұрылыс ауылынан Жамбыл облысының шекарасына дейін) және Жамбыл облысы бойынша 143-214 шақырым (Алматы облысының шекарасынан Қордай ауылына дейін) аралығын қамтиды. Бұл учаскелердегі қозғалыс 9 ақпан күні түнгі сағат 02:00-де қайта жанданады деп күтілуде.
Фото: Әлеуметтік желіден
