Сурет: Egemen Qazaqstan
Астанада тұрғындар мен қала қонақтарына арналған есірткі құқықбұзушылықтарының алдын алу акциясы жаңа форматта өтті, деп хабарлайды Zhaiyqmedia.kz ақпарат агенттігі.
Іс-шараны Астана қаласы Полиция департаментінің Есірткі қылмысына қарсы іс-қимыл басқармасы, «Сарыарқа» ауданы әкімдігі және республикалық Ұлттық ұлан бірлесіп ұйымдастырды. Акцияның мақсаты – халық арасында есірткіге теріс көзқарас қалыптастыру, салауатты өмір салтын насихаттау және «Заң мен тәртіп» қағидатын нығайту.
Профилактикалық шара Есіл өзенінің жағалауында өтіп, көпшіліктің назарын аударды. Кешкі уақытта жағалау бойымен бортында «Астана – есірткісіз қала!» және «Заң мен тәртіп» деген жазуы бар теплоход жүріп өтті.
Іс-шараның ерекше атмосферасын Ұлттық ұлан оркестрінің өнер көрсетуі толықтырды. Музыканттардың кәсіби орындауы акцияның көркін ашты. Олардың музыкалық композициялары қала тұрғындарына көтеріңкі көңіл-күй сыйлап, шараны есте қаларлық мәдени оқиғаға айналдырды.
Кейін бағдарлама жағалауда өткен оркестр концертімен жалғасты. Сонымен қатар тұрғындарға есірткінің зияны мен оның заңсыз айналымының салдары туралы ақпараттық парақшалар таратылды.
Ұйымдастырушылардың айтуынша, қазіргі профилактика тек түсіндіру жұмыстарымен шектелмейді, сонымен қатар маңызды әлеуметтік үндеулерді халыққа тиімді жеткізуге мүмкіндік беретін жаңа форматтарды қамтиды.
Іс-шараға еріктілер де қатысып, акцияны ұйымдастыруға және тұрғындармен жұмыс жүргізуге белсенді атсалысты.
