Қазақстанда ЛГБТ қозғалысына қатысты заңнамалық өзгерістер қарастырылуы мүмкін. Бұл туралы Мәжіліс депутаты Еділ Жаңбыршин Парламент палаталарының бірлескен отырысынан кейін кулуарда мәлімдеді.
Халық қалаулысының айтуынша, үкіметтік емес ұйымдардың зерттеу нәтижелері депутаттар арасында да талқыға түскен. «Комиссияға келген сарапшылар нақты деректерді алға тартты. Біздің қоғамда ЛГБТ насихатының бар екені жасырын емес. Әсіресе әлеуметтік желілерде бұл бағыттағы үгіт-насихат ашық жүргізілуде. Қауымдастық өкілдері өздерін жария түрде таныстырып, түрлі акциялар ұйымдастырып жүр», – деді Жаңбыршин.
Депутаттың сөзінше, мәселе заң аясында реттелуі мүмкін, қазіргі таңда бұл бағытта тиісті ұсыныстар қарастырылып жатыр.
