Мемлекет басшысы Қасым-Жомарт Тоқаев Бахрейн Королі Хамад бен Иса Әл Халифамен телефон арқылы сөйлесіп, Таяу Шығыстағы ушыққан ахуалды талқылады, деп хабарлайды Zhaiyqmedia ақпарат агенттігі.
Президент Иранға қарсы қақтығысқа араласпаған Бахрейн мен өзге де елдердің азаматтық инфрақұрылымы зымыранмен атқыланғанына терең алаңдайтынын жеткізді. Ол Қазақстанның осындай қиын-қыстау сәтте Бахрейн халқына тілектес екенін атап өтті.
Сонымен қатар Қасым-Жомарт Тоқаев Қазақстанның жағдайды одан әрі ушықтыруға қарсы екенін және кез келген қақтығысты тек диалог пен дипломатия арқылы бейбіт жолмен шешуді қолдайтынын мәлімдеді.
Өз кезегінде Король Хамад бен Иса Әл Халифа үнемі қолдау көрсетіп келе жатқаны үшін Қазақстан Президентіне ризашылығын білдірді. Ол екіжақты ынтымақтастықты, әсіресе сауда-экономикалық және инвестициялық байланыстарды жандандыруға ниетті екенін растады.
Тараптар екі ел арасындағы достық қарым-қатынас пен серіктестікті нығайтуға бейіл екендерін жеткізіп, қасиетті Рамазан айында екі ел халқына тыныштық пен бақ-береке тіледі.
Фото: Әлеуметтік желіден
