Сурет: Орал қ әкімі
Орал қаласының әкімі Мұрат Байменов сквер реконструкциясын тексерді,-деп хабарлайды Жайықмедиа.кз.
Бүгін Орал қаласының әкімі Мұрат Байменов Некрасов скверінде жүргізіліп жатқан реконструкция жұмыстарымен танысты. Сквер қаламыздың ең тығыз орналасқан аудандарының бірінде орналасқан және тұрғындарға жайлы демалыс, спорт және серуендеуге арналған жаңа кеңістік ұсыну мақсатында жаңартылуда.
Мұрат Байменовтің айтуынша, жобада барлық жас ерекшеліктері ескерілген: балалар алаңдары, воркаут аймақтары, спорттық тренажерлер, веложолақтар мен жаяу жүргінші жолдары, сондай-ақ беседка, ротонда және субұрқақтар қарастырылған.
Сквер аумағына 50 қарағай мен 50 қайың отырғызылып, суару жүйесі автоматтандырылған. Жарықтандыру жүйесі жаңартылып, заманауи LED-шамдар мен жарық аркасы орнатылды. Барлық жұмыстар қаланың 12 мың м² аумағында асфальт, тротуар плиткалары мен тартан жабыны төселу арқылы жүзеге асырылған.
Әкім Мұрат Байменов скверді тұрғындардың қауіпсіз және сапалы демалуы үшін толық аяқтап, пайдалануға беруді бақылауға алатындығын атап өтті. Жаңартылған сквер қаламыздың жаңа қоғамдық кеңістігі ретінде тұрғындардың игілігіне ұсынылады.
