Қостанай облысында «Қазақстан темір жолы» компаниясының мүлкін саудалаған теміржол учаскесінің бастығына қатысты сот үкімі шықты, деп хабарлайды Zhaiyqmedia ақпарат агенттігі.
Б. Майлин аудандық соты Құсмұрын жол дистанциясының өндірістік учаскесі бастығын кінәлі деп тапты. Ол рельстерді бекітуге арналған Р-65 маркалы 40 дана темір төсемшені сатып үлгерген. Бұл – теміржолдың аса маңызды бөлшектері саналады. Келтірілген шығын көлемі 200 мың теңгені құрады.
Сот процесі кезінде айыпталушы кінәсін толық мойындап, ісіне өкінетінін жеткізген. Ұрланған бөлшектер тәркіленіп, кәсіпорынға қайтарылды.
Жәбірленуші тарап – «ҚТЖ» АҚ өкілі соттан айыпталушыға бас бостандығынан айырумен байланысты емес жаза тағайындауды сұрады.
Сот бұл өтінішті ескеріп, айыпталушының бұрын сотты болмауын, шын өкінуін және кәмелетке толмаған балалары барын жазаны жеңілдететін мән-жайлар ретінде қарастырды.
Нәтижесінде сотталушының бостандығы екі жылға шектелді. Сонымен қатар, оған материалдық жауапкершілікке қатысты қызметпен айналысуға тыйым салынды.
