Қазақстанда жанармай бағасының күрт қымбаттауына бір жылдан аз уақыт қалды. Егер билік бағаға уақытша шектеу қоя алмаса, алдағы уақытта елдегі бензин құны Ресеймен теңесуі ықтимал, деп хабарлайды Zhaiyqmedia ақпарат агенттігі.
Сарапшы Олег Червинскийдің айтуынша, 2023 жылдың соңында Еуразиялық экономикалық одақ елдері ортақ мұнай және мұнай өнімдері нарығын қалыптастыруға келіскен. Бұл келісім 2027 жылдың 1 қаңтарында күшіне енеді.
Алайда Червинский Қазақстандағы баға өзгерісі одан әлдеқайда ерте басталатынын ескертті.
«Іс жүзінде бұл дегеніміз — биылдың соңына қарай Қазақстандағы жанармай бағасы Ресеймен тең деңгейге жетуі керек. Қазіргі бағамен салыстырғанда біздің елде бензин екі есе арзан. Дәл осындай айырмашылық Қырғызстанмен салыстырғанда да байқалады», – деді Червинский.
Президент Қасым-Жомарт Тоқаев та бұл мәселеге назар аударды. Ол жақында берген сұхбатында бензин бағасы арзан болғанымен, одан қарапайым халық емес, ірі кәсіпкерлер пайда көріп отырғанын айтты. Мемлекет басшысы Қазақстан көрші елдер үшін арзан жанармай көзіне айналғанын атап өтті.
Сала мамандарының сөзіне қарағанда, жанармай бағасының жасанды түрде төмен ұстап тұруы елдегі отын тапшылығына, мұнай өндіру саласына инвестиция азаюына және ішкі сұраныс толық қамтылмауына әкелген.
Сондықтан сарапшылар мұндай жағдайдан шығудың жалғыз жолы – бағаны нарық заңына сай реттеу екенін айтып отыр.
