Ұлттық банк төрағасы Тимур Сүлейменов доллар бағамы 1500 теңгеге дейін шарықтауы мүмкін деген болжамды жоққа шығарды, деп хабарлайды Zhaiyqmedia ақпарат агенттігі.
Оның айтуынша, бұл болжамның ешқандай негізі жоқ және ең консервативті есептеулерде де мұндай көрсеткіш қарастырылмаған.
«Бұл – мүлдем қате көрсеткіш. Біздің ең консервативті, тіпті ең радикалды болжамдарымызда да мұндай сан жақын да жоқ. Қазіргі бағам – қалыпты, теңгерімді. Егер Үкіметпен бірлесіп, сауатты макроэкономикалық саясатты жалғастырсақ, ауыл шаруашылығы, өнеркәсіп сияқты салалық саясаттар аясында дұрыс шешімдер қабылдасақ, яғни өзімізді барлық өнім түрімен қамтамасыз ете алсақ, онда бағам мен инфляция мәселелерінің өзектілігі әлдеқайда төмендейді. Сондықтан алда атқаратын жұмысымыз көп. Ал 1500 теңге туралы сұрамай-ақ қойыңыздар», – деді Тимур Сүлейменов.
Осылайша Ұлттық банк басшысы елдегі макроэкономикалық саясат дұрыс жүргізілсе, теңге бағамының тұрақты болатынына сенім білдірді.
Фото: Әлеуметтік желіден
