Оралда Назарбаев даңғылы бойындағы үйлердің қасбеттері демеушілер есебінен жаңартылуда,-деп хабарлайды Жайықмедиа.кз.
Орал қаласында тарихи орталықтың сәулеттік келбетін сақтап, абаттандыруға бағытталған жұмыстар жалғасуда. Соның аясында Назарбаев даңғылы бойындағы тұрғын үйлердің қасбеттері демеушілер есебінен жаңартылып жатыр. Қазіргі таңда Сарайшық көшесінен Пугачев көшесіне дейінгі аралықтағы 20 үйдің сырты боялып, сыртқы көрінісі ретке келтірілуде.
Жаңарту жұмыстары кезінде бояудың түсі бірыңғай дизайн кодына сәйкестендіріліп таңдалып, даңғылдың архитектуралық үйлесімі сақталуда. Бұл бастама қаланың көркін арттырып қана қоймай, ескі ғимараттардың тарихи ажарын сақтап қалуға да ықпал етеді.
Алдағы уақытта демеушілердің қолдауымен өзге де үйлердің қасбеттерін жаңарту жоспарланған. Бұған қоса, биылғы жылы қала бойынша 58 көпқабатты тұрғын үйдің қасбеттерін жөндеу жұмыстары жүргізілуде.
Бұл жұмыстар Оралдың қала мәдениетін айшықтап, тұрғындардың тұрмыс сапасын жақсартуға бағытталған маңызды қадам болып отыр.
