Грузияның Имерети өңірінде полиция аса ірі көлемде есірткі сақтап, сатуға дайындаған екі шетелдікті ұстады. Олардың бірі – Қазақстан азаматы, енді ол өмір бойына сотталуы мүмкін, деп хабарлайды Zhaiyqmedia.kz ақпарат агенттігі.
Полиция қызметкерлері күдіктілердің көлігі мен тұрғын үйін тінту кезінде 12 келі героин, 2 келі метадон және 4 келіге жуық басқа да есірткі заттарын тапты. Бұл – аса ірі көлем, сондықтан іс Грузияның қылмыстық кодексінің ауыр бабы бойынша қозғалды.
Қазіргі уақытта екі күдікті де уақытша ұстау изоляторына қамалды. Олардың іс-әрекетіне қатысты тергеу жалғасуда, – деді полиция өкілі.
Егер кінәсі дәлелденсе, Қазақстан азаматын өмір бойына бас бостандығынан айыру жазасы күтіп тұр. Грузия заңнамасы бойынша есірткі саудасына қатысты мұндай істерде ең ауыр жаза қарастырылған.
