Астанада 13 жастағы жасөспірімнің операция кезіндегі өліміне қатысты екі жылға созылған сот ісі аяқталды, дәрігер-анестезиологқа қатысты үкім шығып, бірақ ол рақымшылықпен жазадан босатылды, деп хабарлайды Zhaiyqmedia ақпарат агенттігі.
Қайғылы оқиға екі жыл бұрын жазда болған. Жасөспірімге полиптерді алу бойынша жоспарлы операция жасалған. Алайда анестезиологтың қателігінен жалпы наркоз кезінде бала операция үстелінде қанға тұншығып, көз жұмды.
Тергеу барысында Денсаулық сақтау министрлігі бұл жағдайды ағзаның сирек кездесетін реакциясымен байланыстырмақ болды. Дегенмен, сараптамалар дәрігердің өз міндетіне салғырт қарап, кәсіби қателік жібергенін толық растады.
Сот процесінде дәрігер өз кінәсін мойындамады. Ал баланың ата-анасы кінәліге ең қатаң жаза тағайындауды талап етті.
Сот қорытындысы бойынша дәрігер екі жылға бас бостандығынан айырылып, үш жылға дейін медициналық қызметпен айналысуға тыйым салынды. Алайда ол рақымшылық жасау туралы заңға сәйкес нақты жазадан босатылды. Сот үкімі заңды күшіне енді.
Фото: Әлеуметтік желіден
