Мемлекет басшысының өкімімен Айбек Смадияров Қазақстан Республикасы Президентінің кеңесшісі – баспасөз хатшысы қызметіне тағайындалды, деп хабарлайды Zhaiyqmedia ақпарат агенттігі.
Тиісті жарлыққа президент Қасым-Жомарт Тоқаев қол қойды. Бұл туралы Ақорданың баспасөз қызметі мәлімдеді.
«Айбек Болатбайұлы Смадияров Қазақстан Республикасы Президентінің кеңесшісі – баспасөз хатшысы лауазымына тағайындалсын, ол бұрынғы атқарған лауазымынан босатылсын», – делінген ресми хабарламада.
Айбек Смадияров бұл қызметке келгенге дейін Қазақстан Республикасы Сыртқы істер министрлігінің ресми өкілі болған. Ол бұл лауазымда 2022 жылдан бері қызмет етіп келді.
Еске сала кетейік, бұған дейін президенттің баспасөз хатшысы қызметін Берік Уәли атқарған еді. Ол жақында «Қазақ газеттері» жауапкершілігі шектеулі серіктестігінің бас директоры болып тағайындалды.
Фото: Әлеуметтік желіден
