Мемлекет басшысы Қасым-Жомарт Тоқаевтың денсаулық сақтау жүйесін жетілдіру жөніндегі тапсырмасына сәйкес, Батыс Қазақстан облысында саланы дамыту бағытында бірқатар маңызды шаралар жүзеге асырылуда. Инфрақұрылымдық жобаларды іске асырумен қатар, шетелдік клиникалармен тәжірибе алмасу және халықаралық әріптестікті кеңейту жұмыстары жүргізілуде. Солардың айқын дәлелі – БҚО мен Квандонг университеті жанындағы Халықаралық Әулие Мария клиникасы арасындағы меморандум.

Облыс әкімі Нариман Төреғалиев Корея Республикасына жұмыс сапары барысында аталмыш клиникада болып, бірлескен жобалар аясында атқарылып жатқан жұмыстармен танысты.

– Біз бүгін екі ел арасындағы ынтымақтастықты жаңа деңгейге көтеретін маңызды кездесуге жиналдық. Медициналық қызмет сапасын арттыру, заманауи технологияларды енгізу және халықаралық тәжірибеден үлгі алу – өңірлік денсаулық сақтау жүйесінің басым бағыттарының бірі. Квандонг университеті жанындағы Халықаралық Әулие Мария клиникасымен серіктестік жаңа мүмкіндіктер ашады, – деді облыс әкімі.

Қазіргі таңда БҚО-дан 9 маман – нейрохирург, травматолог, невропатолог, онколог, медбике және медициналық ұйым басшылары клиникада тағылымдамадан өтіп жатыр. Бұл тәжірибе өңір тұрғындарына көрсетілетін медициналық қызмет сапасын едәуір арттыруға бағытталған.

– Ко Дон Хён мырзаға және клиника ұжымына қазақстандық мамандарға көрсеткен қолдауы үшін алғыс айтамын. Біз ұзақ мерзімді, өзара тиімді әріптестікке мүдделіміз. Ынтымақтастығымыз өңір медицинасының дамуына, ең бастысы – тұрғындар денсаулығын жақсартуға зор үлес қосады, – деді облыс әкімі.

Кездесу соңында Квандонг университеті жанындағы Халықаралық Әулие Мария клиникасы, Қазақстан Республикасының Кореядағы Елшілігі және БҚО әкімдігі денсаулық сақтау саласындағы ынтымақтастық туралы халықаралық меморандумға қол қойды. Сонымен қатар, тағылымдамадан өткен дәрігерлер мен медбикелерге клиника тарапынан сертификаттар табысталды.